歐元風光不再！喺德國法蘭克福對住歐央行總部對咗十幾年嗰件歐元雕塑開始甩皮甩骨。呢件高46呎嘅藍色歐元Logo雕塑有12粒黃色星星，仲裝咗燈膽，原本同歐元一樣閃閃發亮。
不過，呢個象徵歐元嘅標誌，依家唔單止畀人貼貼紙破壞，有粒星星仲畀人油咗變紅色，情況就同歐元一樣：殘。
試諗吓滙豐對銅獅子，又或者華爾街隻銅牛生鏽甩色，你會點？有奧地利遊客就覺得慘絕人寰，仲寫咗封公開投訴信畀法蘭克福市長，話呢件「歐元」雕塑係「代表3億人民嘅未來與希望」咁話。
不過，未必個個咁睇。3年前當地有人建議將呢件「歐元」送去博物館，依家有人話索性拆咗佢算，甚至有人話呢件嘢「無恥地榮耀金錢嘲弄貧窮」，直頭應該炸碎佢送番畀原作者。
呢件「歐元」坐落喺歐央行總部對出，話晒13年嚟日對夜對住歷任歐央行行長，咁歐央行又點睇？佢哋冇得點睇，事關呢件「歐元」原來唔屬於歐央行所有，所以近排央行搬屋都無帶佢走。
咁點算？擁有呢件「歐元」嘅民間團體話，每年着燈同維修要使1.5萬至3萬歐元，歐元愈貶值，維修費就愈貴，若要換埋LED燈膽，今年條數分分鐘仲會去到6萬歐元。
為咗救救「歐元」，嗰團體已經開聲叫當地銀行幫手，但當地市政府講到明無意泵水。同歐元一樣，呢件雕塑都唔知仲捱得幾耐。
余絲韻