近年沽空機構頻頻出動搵食，甚至有民企要喺短短幾個月內同沽空機構數度駁火，疲於奔命。若咁好彩畀沽空機構睇中，要打番場反狙擊戰，你估要使幾多錢？
絲絲收到風，曾經有民企不忿成為沽空機構嘅搵食對象，就調動咗成4,000萬美元（約3.12億港元）嚟護盤，以力保股價不失。點護盤？咁奧妙嘅嘢，絲絲唔曉。
再講番，據路邊社消息，呢間公司淨係為咗應付指控，幾次發澄清通告，背後付出嘅法律諮詢、審計等等額外支出，已經高達幾百萬美金，多過好多創業板公司一年嘅盈利，都咪話唔「乸脷」。
「沽空機構」有名你叫，搵食方法不外乎先沽空目標股份，繼而出報告唱淡間公司，令間公司嘅股價插水，然後再喺低位撈返平貨冚倉賺錢。
香港有咁多間上市民企，對沽空機構嚟講，呢處簡直係樂土，就算證監舊年年底出手，對曾經狙擊恒大（03333）嘅Citron Research同發表紅旗報告嘅穆迪採取行動，但其他同類機構好似Emerson同Glaucus等，似乎未驚過。
唔少內地民企近年經歷市場洗禮，優勝劣敗，畀沽空機構狙擊嘅亦未必係爛蘋果。絲絲反而好想知，嚟香港上市嘅民企睇住戰事一場接一場，有無學精咗，事先將反狙擊條數計埋入去嘅呢？
余絲韻
作者：余絲韻