Market Insight:買盤擴散至中型股

以為周三假後重開的2,500億元成交好多?查實一山還有一山高,大媽與大孖沙的恐慌性追貨只係序幕。昨日恒指高開676點,開市無耐即抽升1,685點,去到27,922點,四月期指只差一點掂到兩萬八點大關。之後A股由七年高位回落,港股先肯由瘋狂的升幅中回順,升707點收報26,944點,主板成交達2,915億元,國指升351點報13,748點。

睇見恒指波幅指數升6.66至25.39,是一三年六月以來最高,而傍晚港匯觸及7.75強方兌換保證,金管局要出手干預,今次洪潮殺到的狂態,絕對唔講得笑。

過去兩日恒指留低兩個上升裂口,分別是周三的25,297至25,640點,以及昨日的26,247至26,732點。昨日大市日線圖出現短期見頂的射擊之星,睇怕第二個裂口要補一補,後市至會肯再升過,但第一個裂口都補埋萬萬不能補,否則過去兩日共5,415億元成交,追位衝浪者將意味全部被綁。

學習揣摩大媽口味

古勝收市後四圍收風,啲傳統基金只得零星客戶趁高贖回,有對沖基金朋友,亦響應內地券商呼籲,話港股的資金盛宴只係啱啱開始,未有耐想去做淡咁話。

查實,港股單日可以狂升千七點,升幅6.4%,睇落好鬼癲,好似千多隻股票幾日之間變晒博彩股。不過,講句公道話,年初至今恒指累積升幅14.1%,還未及日經指數同期的14.2%升幅,更遑論滬綜指的22.3%。落後得太耐,或者大家先睇唔慣港股可以幾日之間由蛇變龍。

過去五年,港股一直大幅跑輸歐美等成熟市場,去年中開始,更被A股遠遠拋離,港股整體估值其實唔貴,只不過今次北大人向香港股市伸出無形之手,官方喉舌加入唱好不特止,仲批埋公募基金可經港股通入市,令修正來得既快且狠。香港投資者由以往睇實外資大行鼻息入市,到依家要去揣摩內地大款與大媽的口味,真係要啲時間去適應。

然而,有一個趨勢可以肯定,過去兩日所見,中資股升勢不再集中重磅中資股,不少買盤流向二三線國企及細價股身上。

A股化派對剛開始

隨着深港通通車,以及監管機構放晒風,港股通的投資名單下半年可能加入中型及細價股,港股脫離半死不活的日子,變身A股化的雞犬皆升,機會是不可抹殺。

紅色散戶主導的港股,口味轉得勁快。昨日AH股差價炒風稍見收斂,反而大媽開始追一些內地馳名企業,聯華超市(00980)、聯想集團(00992)、雨潤食品(01068)、蒙牛(02319)、阿里影業(01060)及國美電器(00493)等等,早段升幅都誇張之極。只可惜升勢又捱唔到收市,唔少早市追貨的收市都要坐艇。

昨日經港股通,錄得最多資金淨買入十隻股票,分別係中芯(00981)、國美、中廣核電(01816)、阿里影業、華南城(01668)、保利協鑫(03800)、中海集運(02866)、中國南車(01766)、農行(01288)及波司登(03998)。

聯華最終狂升44.4%,收報7.21元,昨公司股東百青投資,向A股上市公司永輝超市(601933.SH)出售2.37億股內資股份,佔已發行股本21.17%,每股作價3.92元。

基本因素上,內地反貪影響,過去幾年零售市道低處未算低,唔單止奢侈品消費,就連超市及便利店生意都受衝擊,聯華舊年賺得3,103萬元人仔,按年倒退41.4%,同一一年度賺6.26億元比較,僅及當年百分之五。係就係去年度第四季虧損有所收窄,高管向大行放風第一季同店銷售開始穩定落嚟,業績好大機會在最快今年見底,但四日升咗八成二,點追呀!

財富效應推升樓市

差餉物業估價署最新數據,二月本地整體私人住宅售價指數又創新高,連升十一個月,去到291.1。二月底,港府針對「絕唔便宜」的細價樓,收緊按揭條件的辣招,但睇番過去幾星期的樓市成交新聞,辣招的作用猶如泥牛入海。

依家同胞們唔單止搶奶粉、搶學位,仲玩埋搶股票,相對之前盲搶,今次香港魚缸多咗新水南下,或者享受到好處的香港人會比較多,但財富效應帶動,中短期香港樓市更加易升難跌。本地地產股好似長和(00001)及新地(00016)點都可以睇高一線,如果看官們唔嫌佢哋升得慢的話……

古勝