尋日見到朗詩綠色地產（00106）主席田明，比大半年前清減咗！原來佢好努力做運動，減咗10公斤，佢仲講笑話「因為房地產生意少了，多了時間做運動！」
絲絲聽聞，田總亦好鍾意攀山，係「攀」，唔係「行」嗰隻，事關引得起田總興趣嘅，係珠穆朗瑪峰嗰類山，所以係「攀」嘅，佢呢幾年都有組隊同公司同事攀唔同嘅山，征服過珠峰添呀！
查實，另一位內房老闆萬科（02202）總裁郁亮同樣鍾意行山跑步，前排有朋友邀請佢去日本富士山環山跑五日，要跑100公里，可惜嗰次佢自言力有不逮婉拒咗。佢哋啲山個個都……絲絲級數只係大嶼山。
余絲韻