絲絲講場：應節產品「愚」樂無窮

1.「米珠」玩到上少林

小米雷軍下一個市場，就寄託喺男人嘅右腕之上。小米同少林寺啲大師合作研究咗經年嘅智能產品「米珠」，即係佛珠版嘅小米手環。啲珠功能多多，潮玩可以用嚟影相、睇時間、計步兼檢測睡眠，傳統啲亦可以數佛珠念經，搓下啲珠就可以充電。

2.Uber呼喚周公專車

「久矣吾不復夢見周公」，點算？得，Uber推出Call周公專車服務，操作步驟同平常Call車差不多，記得最後選項要揀「呼叫周公」。專車車程30分鐘，配有腦波振動睡眠座墊，坐咗上座墊，包保周公隨傳隨到。不過「周公專車」只開尋日，僅行走台北。

淘寶「心挑」揀心水

三星手機變菜刀

3.淘寶「心挑」揀心水

行街食飯買嘢有選擇困難症？淘寶研發咗「心挑」功能，你戴住Apple Watch呢類穿戴工具，系統會分析你嘅潛意識，你望住件衫三秒，即刻話你知買唔買好。嗱，若是你唔知自己要揀A君、B君、C君、定X君，「心挑」應該一樣使得，但個功能今年秋天先正式出，你等得嘅就等啦。

4.百度「神燈」乜都識

你有佛珠，百度都有「百度珠環」，仲玩埋全息投影，想訂戲飛？粒珠就將訂飛畫面射落手腕變Mon畀你襟。睇完戲想同Honey玩煮飯仔但唔識煮？百度個「神燈搜索」幫到你，手機裝咗，你好似神燈咁捽兩捽個手機，再對住手機問句「點煎羊架呀」，手機就會彈個靚仔廚師嘅立體投影出嚟，一步步教你煮飯仔。絲絲就會叫Honey自己返屋企先。

Audi房車煲埋靚飯

騰訊企鵝返鄉下

5.微軟智能錶 突襲Apple？

Apple Watch四月就正式登場，微軟尋日公布推出Surface Watch嚟個單挑先，唔知行Window 8定10呢？

6.三星手機變菜刀

三星推智能手機Galaxy Blade Edge，最勁賣點係可以當菜刀用，仲要防水防火，細細部方便隨時攜帶，爬過摺櫈頭，成新一代嘅十大武器之首。

7.Audi房車煲埋靚飯

揸揸吓車肚餓點算？Audi 好細心，喺高級房車A8 5.5限定特仕版嘅後座中央扶手，設置一個全球獨一無二嘅電飯煲，隨時隨地歎碗熱辣辣珍珠米飯，座椅設計仲要係高級和風Style。

8.「自拍神車」任你影

揸住車拍Selfie使乜停車熄匙，Honda推出部「自拍神車」HR-V Selfie，架車內外裝足10個鏡頭，方便你無時無刻Chok足360度。

9.魅族馬桶高智能

有啲人會認廁，唔係自己屋企嘅廁所就辦唔到大事，魅族就出咗個識認人嘅智能馬桶mBoom。mBoom會認得便便嘅主人，如果有外人無啦啦幫襯你個私家mBoom，mBoom會即刻通知你，甚至幫你報警。國人從此唔使去日本撲電子廁板喇。

騰訊企鵝返鄉下

南極唔只有企鵝，遲啲仲會多隻馬，就係馬化騰。騰訊宣布佢深汕、天津同上海嘅大型數據中心，二○一七年會陸續搬去南極，仲會喺南極起個全球新總部，預計二○一九年落成。

余絲韻