融創（01918）最近買乜都好似有啲阻滯，好似佢哋收購佳兆業（01638），就遇到境外債權人唔肯支持債務重組，難怪一排無露面嘅融創董事長孫宏斌，尋日喺業績記者會盡顯「地產狂人」本色。
融創年初宣布入股佳兆業做「白武士」，料唔到佢啲債務愈揭愈多。點解唔等佳兆業完晒債務重組先入主？孫總話「如果我不進場，這公司春節前就死了，所有員工包括管理層都離職了...公司沒有錢，它活不下去啊！」
但係，依家佳兆業境外債權人認為債務重組條款苛刻，點都唔肯簽支持協議喎！孫總直斥啲債權人根本唔了解佳兆業目前情況，甚至仲多番要公司畀債息，孫總直頭炮轟：「佳兆業你們（債權人）是買錯了，肯定買錯了，因為它負債表不對的！當你三月三十一號看過佳兆業所有報表之後，你要是還不承認買錯，認為它是好公司的話，你就等它死吧！」
咁融創同綠城（03900）就收購合營項目各執一詞單嘢又點？孫總企硬話「已經完成收購」。但九倉（00004）仲公開話有意收購喎？孫總一聽到立即發炮：「做人做企業你不能這樣，因為你明明作為綠城股東，應該知道它簽了一個合法的合同，你既然知道還說要收購的話......」
睇嚟，孫總團火抑壓咗好耐，絲絲眼睇住會上火花四起完全無停過。最無辜嘅都係會上位MC（主持），無諗過阿孫總過晒答問時段後，仍然咁想答嘢，結果就畀孫總「你下去」咁喝咗落台。
不過，孫總轉頭又話，體會到任何交易都有風險，過程中最緊要識得判斷同有耐性，就好似搵對象咁！係囉，孫總出咗名幾經浮沉，有乜風浪未見過吖？
余絲韻