期指觀瀾：破24569淡倉止蝕
滙豐中國三月PMI初值數據奇差，斷估昨日都係畀機會淡友發圍，殊不知A股抗跌力強大至此，即由即市低位3,600點殺番上3,691點，拗腰倒升3點收。期指全日為之馬首是瞻，十一點半後跌幅收窄，悶到收市，恒指跌94點收報24,399點，期指高水23點收24,423點，成交5.3萬張。
昨日按計劃在開市做淡，開24,464點，即市在24,486點見頂，之後A股開始級級落，以170至200點即市波幅，預咗期指即市好可能見到24,200點附近，結果落到24,298點停步，跟A股炒番轉頭。
昨日恒指高位24,490點，未考驗到25,101至23,677點調整浪的0.618反彈阻力24,557點，即市尚未見到好淡友有主動嘗試挑戰重要支持或阻力的意圖，反映挾在高位受阻的美股及牛氣沖天的A股之間，大孖沙仍未選定站邊一面。
A股兩市成交達1.4萬億元人民幣，是去年十二月初以來最勁，大成交拗腰會否意味短期兩融消耗殆盡，技術性升浪短期去到尾聲，高位開始見爭持，而港股即市又愈來愈受A股左右，好倉客的即市風險有所增加。昨AO價24,464點開的淡倉，暫以升穿24,569點止蝕，初訂食胡目標在24,120至24,200點之間。
John Mullen