絲絲講場：四叔賀壽化身白之戀人
今年嘅白色情人節，絲絲收到一盒好Sweet好特別嘅朱古力，係四叔（恒地主席李兆基）Crossover嘅白之戀人，內附一張生日請帖，係四叔本周四嘅86歲大壽。
嘜頭印朱古力盒做禮
原來四叔幸運號碼係「6」，佢今年86歲，所以特別歡喜，於是搞搞新意思。四叔農曆正月廿九日出生，計番今年新曆係三月十九日，每年都係白色情人節前後。四叔啱啱就去咗北海道旅行，參觀咗白之戀人館，仲訂造咗一批四叔嘜頭朱古力，印埋四叔至愛嘅「萬事如意」，隨生日請帖附贈。
筵開15圍宴親朋同事
每年四叔大壽，都係低調喺佢半山麥當勞道惠苑大宅食飯，雖然只請至親好友同恒地高層，但人數就不斷增加，聽聞今年要大開15圍添。相信都係例牌由「富豪飯堂」福臨門到會，再加親友送上嘅超大蛋糕。絲絲聽聞，四叔呢排已陸續收到生日禮物，鮑參翅肚又再堆滿佢國金中心Office。
四叔屋企到時有成百幾二百人到場，擔心四叔屋企坐唔落咁多人？大家少擔心，四叔屋企係有成八千呎坐擁私家天台泳池嘅三層複式。
唔知四叔今年有乜生日願望呢？呢兩年樓市居高不下，帶挈恒地賣樓大賺，絲絲就希望四叔嚟緊呢年，可以再捐多啲地畀年輕人上車，咁就好喇。
余絲韻