深圳創業板指數步步高陞，帶挈唔少上市公司大股東搭A股直升機身家暴漲，尤其係搭上IPO創富神器嘅，更加即入億萬富豪行列，甚至可能坐埋首富個位。邊位咁勁？就係下周二招股嘅創業板新貴「藍思科技」嘅大股東周群飛。
有人計過數，藍思科技上市後，周群飛直接同間接持股嘅市值可能高達466億人仔，大有機會搶埋碧桂園（02007）創辦人楊國強千金楊惠妍嘅中國女首富寶座。
創業板就一定係細公司？No！呢間藍思科技主要生產手機同平板電腦防護玻璃，係Apple產業鏈嘅主要供應商之一，往年公司收入過百億元（人民幣‧下同），純利有成11億元。藍思科技仲要係股權高度集中，公司上市後周群飛持股接近九成，身家水漲船高都順理成章。
藍思科技上市嘅「合理」市盈率應該係32倍，但近期創業板狂升，去到45倍都好大機會，照咁計藍思科技嘅市值可能升到530億元，而直接同間接持有5.92億股嘅周群飛，身家將達466億元，即係比胡潤女富豪榜首楊惠妍當時身家440億元多少少。
余絲韻