絲絲講場：滙控大班「雞」有風味
滙控（00005）CEO歐智華太太Amanda一向低調，呢位大班夫人早自○三年就喺半山開咗間小店，專賣鬼佬口味嘅燒雞，就喺上半山扶手電梯附近。
歐智華太座開燒雞店
不過，咪以為叫件雞就有得捕捉大班夫人嘅風采，佢好少喺舖頭現真身。就算係滙豐嘅同事，好多都唔知，有人喺滙豐做咗6年幾，走咗先知大班夫人有間燒雞店。
Amanda間主打佢家鄉澳洲菜，啲雞講到明從澳洲新鮮空運到港。除咗秘製燒雞之外，仲賣唔少特色食品好似肉批，絲絲試過就最like佢哋嘅澳洲手工啤酒。間舖叫Chicken On the Run，同卡通片《Chicken Run》好相似，有網民直頭大讚啲嘢食一樣「咪走雞」。
隨時食「無情雞」離職
前排Amanda同老公歐智華齊齊被政府追差餉追上法庭，不過，呢間燒雞舖就講到明同老公一啲關係都無，完全係Amanda自己搞。
講開又講，歐智華又要煩逃稅風波同業績，叫佢下台嘅風仲好似愈吹愈勁，太太開舖專賣燒雞，歐智華會否想起「無情雞」而觸「雞」生情呢？
余絲韻