絲絲講場:港交所新董事大猜想

港交所(00388)今日(三月五日)公布全年業績,業績公布完例牌又要開股東周年大會(AGM)選董事,今年港交所董事局會有新氣象,最少有兩名新血加入。

係人都知,港交所13名董事中,有一半係政府委任。今屆AGM,就有兩名政府委任董事許照中同利子厚「夠鐘走人」,即夠六年任期,按例必須退任。咁政府究竟會搵啲乜人代替佢哋入去港交所董事局呢?

有「高人」指點,話正路可以從「梁粉」中諗諗喎!市場人士即時展開「估領袖」遊戲,揣測前行政會議成員林奮強可能係理想人選,佢係「梁粉」之一,又對本港金融及地產事務相當了解。

葉約德女董大熱

市場又貼另一個可能人選係前金管局「女掌櫃」葉約德,事關本港上市公司一向缺乏女董事,港交所目前亦只有一位女董事梁高美懿,作為上市公司嘅「榜樣」,港交所可能需要帶頭加入多啲女性董事咁話喎!

林奮強不置可否

除咗政府委任董事外,港交所仲有一半董事係由股東選出,今年董事選舉就真係熱鬧,因為有3名現任董事陳子政、莊偉林、同胡祖六,按例可以再選。

港交所董事,係非執行性質,一年人工都有70萬元,唔算話好多,但最重要係社會地位,所以,呢個位一向都係搶手貨!

咁大件事,絲絲當然第一時間搵當事人證實吓,林奮強(Franklin)劈頭就話「我自己冇聽過」,但佢又補番句「我唔可以Confirm(確認),亦都唔可以Deny(否認),因為我就算有聽過,呢啲嘢一定簽晒保密協議,唔可以講」。

Franklin,你咁講究竟係有定冇啫?

余絲韻