期指觀瀾：跌近支持或有反彈
人行減息股市反高潮，近排業績股又每每見光死，加埋澳門博彩收入同香港零售數據皆入咗雪櫃，柴靜紀錄片帶動環保概念股都係威得一陣。市場愈來愈短視，今日已經好少見到有故事可以畀基金經理作較長線操作。正所謂氹仔浸蛟龍，使近年大型基金愈來愈難交到表現。唔少傳統long only基金經理索性少做少錯。
講番個市，期指可以咁快去到24,320至24,380點的食胡目標，筆者在周一趁減息偷雞，建議AO沽期指，24,930點成本，三日執600點確實有點意外。
昨日午後期指跌穿24,540點，淡友完全控制大局，期指最低落過24,317點，日市收24,347點，低水118點。由於恒指跌近50日線24,269點，以及月中低位24,226點，相信短期或有技術反彈的可能。
暫時手上無倉，過去三日收成比預期好，在指數貼近短期支持下，筆者不急於立即再入市。或者炒期指初哥以為近期的大低水，與大戶做淡有關，儘管今個月未平倉張數較上月明顯增加，去到11.1萬張，但低水主要反映三月的藍籌接近98點除息的因素。
以昨市收市計，實際比理論值低水只係20點，初學者千祈要搞清楚低水原因！
John Mullen