Market Insight：聯通有上升催化劑

周初古勝預計減息後，股市可能趁好消息出現回吐，但勢估唔到弱成咁，尤其中資金融保險股，周一僅得頭十五分鐘有機會喺靚位落車。恒指同國指都連續兩日陰燭，君可見周一恒指以24,997點開出，連二月初人行意外減存款準備金率後，首個交易日開市價25,048點都去唔到，多少可以感受到，市場對中國放水消息已經無新鮮感，反而群起鬥快掟貨。

睇番二月五日降準之後，恒指開25,048點，用六日時間去到24,226點見底，合共調整822點，今次以24,996點開出，昨日只係第三日，最低見24,439點，暫時跌557點，如果今浪照足上次劇本進行，時間上同深度上，似乎都仲未夠皮。

古勝冇點你

萬里長空

中興受惠4G建網

近日電訊股同樣出現好消息出貨情況，幅度仲唔嘢小。上周中電信（00728）及聯通（00762）正式發LTE-FDD的4G牌照後，兩股三日內累積跌4.3%及6.5%，就連中移（00941）都跌近4%，一如在下之前所指，去年十二月中兩隻跑讓賽的電訊股已經拾級而上，顯然春江鴨早有部署，周一把握到機會落車者，應可以等等。

聯通股價回得最多，皆因份全年成績表認真一般，全年僅賺120.55億元人仔，按年升15.8%，貼近市場預期下限。而高管在業績報告中，直指4G發牌投資加大、營改增稅制變動以及市場競爭變得複雜，預告行業收入可能會放緩，都相當趕客。

管理層一五年固定資產投資預算達1,000億元人仔，都比街外估的800億至900億元人仔高一截，主要希望增強4G網絡覆蓋，配合進取的上客策略。就FDD-LTE牌照準備使多啲錢，市場第一時間諗起中國主要4G設備供應商之一的中興通訊（00763），昨股價升0.26元收17.52元。

扭轉中移獨大優勢

舊年中興份業績已經見到環球4G網絡建設增加的好處，按去年業績快報，收入及盈利分別增長7.9%及94.2%，過去一年，中興在全球取得140份4G網絡建設合約，在整個行業新合約佔有率近兩成，現價一五年PE大約14.6倍，以工業股而言，合理但又未算十分便宜，似乎單是聯通固定資產投資大過預期，可以短炒，但升浪未必會好持久。

反而係如果聯通再回得深啲，可以諗吓撈番。一來睇見騰訊及新浪的網上民調，見超過四成內地市民選擇升級4G的話，會揀聯通，FDD牌發咗之後，似乎中移獨大的優勢好有可能進一步被削弱，未來幾個月開始招客的數據，甚至下半年鐵塔公司分拆的消息，都會係推升股價的催化劑，若返回12元樓下，可以先補番多少貨底。

個市咁差，成班炒家百無聊賴，聚埋一齊研究緊滙控（00005）百五周年紀念鈔申請攻略。以150蚊面值至少賣380蚊（唔少套裝推出價格更高），比○九年渣打（02888）同樣百五蚊面值鈔票底價280蚊，至少高出三成五。

紀念鈔唔易炒得起

先唔講近年內地反貪，大大打擊這類內地人至愛用嚟送禮的紀念鈔市場（其實睇澳門賭場生意同香港奢侈品銷售已經見到一二），滙豐銀行今次推200萬張，數目亦多過當年渣打一倍。市場價格向來由供與求去決定，由此推斷，普通號碼紀念鈔，買番嚟當做善事做個紀念還可，今鋪未必會炒得起。

之不過特別號碼，競投底價都相當進取，單張、三連張及35連張定價去到8,888元、13,888元及68,888元，比「票面值」高58.2倍、29.8倍及12.1倍，比非特別號碼的定價貴22.3倍、9倍及1.88倍。但俗語話物以罕為貴，加埋得幾百套，斷估紀念鈔個市場衰極，短期都未至於「破發」咁肉酸，炒得起機會講到底都比較大。

如果屋企有足夠「人頭」，手頭鬆動（因為要先兌票），底價加些少溢價博下大霧，中咗執番多少，唔中亦無損失，實在一試無妨。

古勝