今日已經年卅，絲絲最關心係放完假返嚟封開工大利是！港股市道好轉，各大券商封羊年開工利是會有幾厚？
信誠證券聯席董事張智威話，港股成交間接受惠於股民「睇A炒H」，公司生意估計有雙位數增幅，今年開工利是可以大封啲、鬆手啲。佢仲話，公司會「揼多啲本」，「搞大」下月喺中環大會堂個春茗晚宴。唔通諗住加多幾份現金大禮？佢笑笑口話「都會有」，但想留番個驚喜畀大家。收到，絲絲識做，唔問住。
至於致富集團主席周松堦就話，對員工嘅「獎勵」會喺份花紅上反映，而開工利是就要「一視同仁」。而時富資產管理董事總經理姚浩然話，今年開工利是估計同往年相若，大概50、100蚊，最重要係利利是是。
而訊匯證券上星期喺彌敦道開新舖，但佢哋行政總裁沈振盈「沈大師」話：「雖然上年市道好咗，但唔係大家所諗咁多」，又慨嘆券商經營環境艱難兼競爭大。放心，羊年到，運會轉，一定會更好，絲絲話嘅。
余絲韻