絲絲講場：新城3D樓落足料打印
3D打印你實有聽過，首飾、糖果、連自己嘅Figure都印到出嚟，連屋都得？冇錯，新城發展（01030）董事長、執董兼CEO王振華喺尋日業績會上話，公司嘗試喺南京用3D打印嚟起住宅樓，預算下半年可以推出市場。真係唔係講笑。
用石屎鋼筋放心住
絲絲都有啲疑惑，3D打印出嚟嘅樓係咩嘢做？唔會係紙啩…放心，新城發展公司秘書黃茂莉講明啲樓都係由石屎同鋼筋組成，可以放心入住。
3D打印起樓，簡單講，就係先喺工廠打印模塊加埋完成簡單裝修，再運去工地砌積木咁砌起。王振華形容就好似「做汽車咁做」，呢種起樓方式非常環保，符合國策，同時可以提高樓宇質素同智能化咁話。
成本貴過傳統住宅
絲絲記得萬科（02202）董事長王石都講過，會研究用3D打印嚟起樓，預計成事要三年。今次新城跑得仲快過萬科，新城正同內地模塊住宅工業合作，喺南京仙林湖項目建造三幢多層「3D房子」做試點，預計下半年就可以應市。價錢方面，「3D房子」成本會較傳統住宅樓貴少少，新城話平均每平方米會貴幾百蚊人仔。
對今年內地樓市，王振華預料「唔會大起大落」，相信今年可供售貨值約540億元（人民幣‧下同），足以完成280億元銷售目標；拿地預算就控制喺銷售額40%以內，即約112億元。
余絲韻