期指觀瀾：持倉過年欠值博率

股市當炒板塊唔多，指數試圖在假期前盡量貼近兩萬五點阻力，但去到24,800點樓上阻力趁機出貨阻力唔輕，恒指即市分別在24,855點及24,833點受阻，收報24,784點升58點，主板成交467億元。即月期指日市收24,830點，高水45點，成交3.65萬張。

過去幾日靜市中，指數出奇地愈走愈高，隔晚美股休市，昨港期早市以24,668點低開，剛好在10日及20日線水平上，可見有心人刻意營造即市有支持現象，A股今日開始長假，港股今日得上晝市，之後就連休四日，今晚坐貨度歲主要考慮歐美市場變化。

從未平倉數字，由月初過十萬張，輕微回落到9.6萬張，話大戶相當有部署，準備來個請君入甕，等假期後復市裂口開出，殺一個措手不及？

睇落唔多似，姑勿論點，恒指處於近日相對的高位，而國指假期前，始然未有意思打破一月初至今浪頂逐漸下移的形態，無論好淡兩邊，開新倉賭初五下周一的復市，都唔太值博，安心享受假期好過，祝大家羊年愉快！

John Mullen