絲絲講場：中環財星羊年各有所求
絲絲尋日行過IFC，發覺呢個香港金融地標已經換上以十二生肖為主題嘅賀年裝飾，原來唔覺唔覺，仲有唔夠兩個禮拜就過年喇。絲絲順便八卦吓金融界老友今年加幾多人工，同埋有咩新年願望。
于正人：發掘新業務
佢哋都話今年有人工加同出花紅，雖然未至於好多，但已經好過前幾年。金融界呢排可謂腥風血雨，上月頭渣打先話喺香港裁成一百人，之後大和、野村都先後傳出裁消息，但絲絲嘅老友又唔係特別擔心喎。
喺IFC返工嘅瑞銀亞洲股票衍生產品銷售部董事總經理于正人話，唔覺得金融界環境轉差。佢又話政府監管嚴格咗，投行依家請緊好多風險管理同法律顧問人才。佢預期羊年會有深港通推出，唔同國家都會減息，令股市暢旺，希望自己做輪之餘，可以發掘多啲新業務。
郭小菱：花紅出多啲
法巴上市衍生產品部執行董事郭小菱就話窩輪市場競爭激烈，投資者又醒咗，生意難做，希望羊年個市好番啲，花紅都出多啲。
講返IFC嘅賀年裝飾，之前就引嚟網民狠批造型奇怪，但日日行經嗰度嘅金融人，又好似反而冇咩特別感覺喎。
見到新嘅賀年裝飾同時，絲絲希望金融界嚟緊新年新景像，羊年可以喜氣洋洋啦。
余絲韻