Market Insight：內房股今年有排炒

由外圍走勢，昨日港股表現確實幾令人失望，恒指開24,750點，較前日升196點後，上午見高位24,824點，下午走晒樣，升幅收窄得番124點，收報24,679點，低過開市價，意味日線圖陰燭收場。國指更加唔在講，A股高開低收，拖累國指衰收尾倒跌1點，報11,767點。

不過，尋晚執筆時人行又一次出其不意，降準50基點，好友求仁得仁，又睇吓大市可否逃出泥淖，恒指、國指得以成功挑戰25,000點及12,400點的阻力位。

古勝冇點你

萬里長空

美股後市存戒心

過去幾日，環球熱錢有零星unwind迹象，較明顯的是過去大半年長沽長贏的期油及歐元空倉，有行番轉頭的情況，紐約期油從一月底低位43.58美元，技術反彈至執筆時的52美元（是昨日三桶油撐起港股主因）；歐元在希臘大選前夕，個個喊驚話兌美元要睇一算水平，結果由1.10邊緣，反彈四百多基點，前日一度返到1.15水平樓上。始終金融產品，跌吓停吓，唔會一條直線咁下沉，不過到底屬短期技術反彈，抑或一個轉角位出現，在下無預知未來的水晶球，惟有等時間告訴我們答案。

近排古勝去過幾個私人銀行投資論壇，不約而同，聽到講者的環球投資展望中，留低的一個註腳，係現時投資市場對美國就業復甦、美國企業盈利持續改善的預期十分樂觀，這點反而令他們對美股的投資風險存有戒心。

一五年只係過咗一個月多啲，環球央行已爭先恐後增加貨幣供應、調低利率，或者像新加坡央行調低通脹預期及匯率波動區間。講到底，歐洲、瑞士、丹麥、印度、南韓一樣，均希望自身貨幣匯率貶值，把經濟及通縮問題出口，結果係最先印銀紙，去年第四季大幅提高量寬規模的日本，貨幣今年不跌反升，甚至成為較美元更強的主要貨幣。

最恐怖之處，是這場貨幣戰爭真係睇唔到盡頭，日本央行要繼續推低圓匯逃避衰退的話，只能好似賭話事啤咁，要叫價更高，反大對手，量寬要再加碼。今晚英國議息，到底有冇條件退市，好快有答案。至於美國三十年債啱啱創完新低，已經話畀大家聽，加息，有拖無欠，就算真係加，幅度亦只會係相當有限。

內地「保七」唔容易

講番祖國，今年經濟唔掂大家已經預咗，應該同中資股買唔買得完全無關。去年第四季中資股的升浪，完全出於市場對利率轉向、內地流動性由緊轉鬆的預期。在今日全球央行競貶下，今年內地GDP要保七恐怕唔容易，這亦解釋到點解去年十一月的減息，以及尋晚的降準行動，都來得比市場預期更早。

睇番中國十年債息，足足比一年前落咗1厘，去到3.4厘附近，進一步減息及匯率貶值，恐怕在未來十二至十八個月內都會持續發生。事實人仔從去年十一月初累積貶值近2%，人仔定存今年恐怕會有賺息蝕價的情況，實在制唔過。

放任樓市泡沫化

今次降準，由於內銀及券商股已經炒過一浸，即使經過調整，股價依然相對處於高位，在下認為在阿爺救經濟，已經唔能夠畀樓市死的大前提下，內房股及一些內房的企業債券，值博率比金融股更佳。事實上，早幾日公布的內地百大城市樓價數據，經過八個月調整，在中央政策力撐下，終於都拗腰向上。

可見未來，在減息與人仔貶值雙管齊下，放任樓市泡沫繼續膨脹，恐怕在所難免，但重申選股要搵一些項目較集中於一線城市，較少染指二、三、四線城市項目，不受囤積貨尾劈價潮影響的發展商為宜，最正路當然中國海外（00688）及華潤置地（01109）兩隻藍籌，另外再加埋兩隻心水股，世茂房地產（00813）及綠城中國（03900），假如今日開出唔太過分，例如裂口開高10%樓下，都可以買定一注。

古勝