市場勁吹渣打（02888）行政總裁冼博德被踢出局，一時又話搵咗獵頭公司物色繼任人，一時又傳已經鎖定兩大人選，講到如箭在弦咁，搞到連之前開盤冼博德「無得留低」嘅博彩公司都封盤唔接受落注。
前排外國博彩商Ladbrokes同Paddy Power開盤「4賠6」及「4賠7」，雖然Ladbrokes反映唔係太多人買重飛估冼博德被Out，但都係時候封盤喇。梗係啦，畀人大注入飛嘅話莊家蝕本都似！
渣打股東見股價狂瀉，心急換人亦係人之常情，有消息指喺大股東淡馬錫同安本施壓下，日內渣打董事會就會開會決定冼博德去留同埋繼任人安排。
依家繼任人跑馬仔，總之有啲亞洲工作經驗底嘅Banker都畀人數過晒，包括星展行政總裁高博德（Piyush Gupta）同花旗亞太區首席執行官卓曦文（Stephen Bird），而聽聞最得大股東歡心嘅，分別係英國萊斯銀行行政總裁奧索里奧（Antonio Horta-Osorio）同滙豐英國行政總裁馬安（Antonio Simoes），睇嚟博彩商又有新嘢可以開盤啦。
余絲韻