為咗實現美國夢，愈嚟愈多內地富商大灑金錢，投資美國房地產，換取永久居留權。最近，美國伊利諾伊州就為翻新一棟摩天大樓集資6,600萬美元，注資呢個項目嘅投資者分分鐘做埋股神巴菲特嘅合作夥伴添。
事關巴郡嘅子公司正就項目同開發商洽談。雖然只係子公司嘅業務，但巴菲特嘅「明星效應」認真唔簡單，好快已經吸引到92個外國投資者注資，當中中國投資者嘅資金已經佔咗成個項目嘅七成。
雖然攤開嚟計，相當於每人至少投資50萬美元就可以攞到一張綠卡，對呢班富豪嚟講真係濕濕碎，但其實佢哋賺到嘅年利率得個0.5厘咋，萬一項目創造嘅就業空缺唔達標，或者蝕埋錢，佢哋拎唔到綠卡不特止，仲會血本無歸添，真係幾大風險架。不過，既然有巴菲特投資呢個「信心保證」，自然人人都信心十足啦。
余絲韻