孖妹S檔案：5個專家教投資 想賺幾多 「油」你話事

期權博反彈勿去太盡

潘：亞達盟環球期貨副總裁 潘志偉

彩兒：期油搶晒鏡，近期一度跌穿45美元關口，上周五才反彈5%。

潘：不嬲係「油價守護神」嘅石油輸出國組織（OPEC）面對油價大瀉，竟然冇調整產量支持油價，反而透過低油價策略搶市佔率，壓縮頁岩油產量增長。市場預期頁岩油產量增長率會大幅下調，再加上內地石油入口需求有所提升，所以我對油價睇法唔太淡，預計上半年會喺40幾美元至50幾美元間上落，下半年隨住供應過剩情況改善，油價或回升至70美元水平。

百利好金業研究部董事 黃耀明

招銀國際策略師 蘇沛豐

不過，油價低迷，散戶要有走勢波動、價格會踩得更深嘅心理準備，如果想投資相關期貨，應盡量降低槓桿比率，投入資金不宜高過整體投資組合資產2%，仲要留意買賣期貨有被追孖展嘅風險，有機會輸凸。

恒生銀行投資產品及顧問業務主管 李佩珊

新鴻基金融 溫傑

散戶可以考慮玩期權控制風險，中長線嘅可以用Bull Call Spread（牛市看漲期權價差）策略入市，買入48美元行使價嘅認購期權長倉（Long Call），再做行使價為65美元嘅沽出認購期權（Short Call）。由於買入貼價嘅Long Call成本較高，再投資Short Call可補足成本，實際成本係7,000美元，另再加5,000美元保證金，一旦睇錯市仲可以保住保證金。

商品貨幣淡加元睇1.3

黃：百利好金業研究部董事 黃耀明

Kitty：嘩！點解油價跌，商品貨幣之一嘅加元都會跌得砰砰聲嘅？

黃：加拿大係油砂出口大國，低油價勢打擊當地出口收入，並對以加國為基地嘅大型油企生意造成威脅。加元已進入大跌浪，加國舊年底消費物價指數（CPI）見負增長，預計今年首季增長會跌至2%以下，央行面對通脹壓力減退，加息機會好微，進一步推低加元，我覺得佢係商品貨幣之中最淡！相信年內美元兌加元會重上1.25水平，最差可見1.30。

強美元令加元跌勢死多兩錢重，油組國賣油係用美元結算，油元（Petroldollar）會流入資產市場，推動美元流動性。石油需求下降，令油價急挫，流入市場嘅油元自然減少，減低美元流動性，成為推升美匯嘅成因之一。有見油價在6至12個月內將於低位浮動，我建議可等加元反彈到1.16水平，入市買美元沽加元作中長線投資。

大油企值博 候低吸納

溫：新鴻基金融財富管理策略師 溫傑

彩兒：我有做功課！美國能源訊息署（EIA）報告預計，去到今年第四季，原油市場仲會Keep住供過於求，即係油股實冇運行？

溫：油價半年內勁彈機會細，再跌空間都唔大，不過，石油輸出國未達成減產協議，好難講油價係咪見底，顧及油股累跌唔少，目前或者係部署入市嘅時機。油價尋底難免令油股受壓，油股自去年九月底一直跟隨油價走勢跌至十二月，但其後油股受影響程度已經減弱，相信股價已反映利淡消息。早前傳出石油暴利稅起徵點上調至每桶65美元嘅消息，無疑有利油股，預料即使油價再跌，中央或會再次推出補底措施支持油企，所以油股上行空間較下行空間為大。

我建議入市策略係買大唔買細，首選中石油（00857）及中石化（00386），貪有國企改革概念，前者可塑性較大，但估計油價反彈前，前者只會喺8.2至9元區間上落，後者區間係6至6.4元，投資者可吼低位吸納。

進取啲嘅投資者不妨選累跌幅度較大嘅中海油服（02883），主因油價急挫未有即時影響內地產油量，雖然管理層已表明一五年收入及盈利會按年下降，但相信現價已大致反映一五年財年嘅情況，而且公司一五年預測市盈率為約7.24倍，估值吸引，預計油價未反彈前將於13至14.2元區間上落。

航運股受惠攻守兼備

蘇：招銀國際策略師 蘇沛豐

Kitty：我最Like搭飛機周圍飛，最近燃油附加費都減咗唔少，睇嚟航空股都繼續飲得杯落！

蘇：航空股升得太急，再加上世銀下調環球GDP增長預測，令全線航空股受壓，但係內地航空股好似東航（00670）及南航（01055）主力經營內地航線，冇咁受新興市場及歐債等問題困擾，等股價回落一成至一成半，不妨買入作中線持有。

其實最近「搭船」好啲！專做集裝箱嘅航運股有機會追落後，龍頭中海集運（02866）最能受惠油價走軟，美國消費市場改善又可以帶動盈利，屬穩陣之選！但2.6元阻力大，可以等回落至2.4元先吸納，中線睇3元；海豐國際（01308）就係細Size嘅首選，佢專營亞洲航線，受惠「一帶一路」國策支持，業績有保證啲，算係強勢股，而且股價仲未反映油價因素，可趁近期走勢落後買入，中線目標5.4元（上周五收報4.21元）。

油價下跌令駕駛人士支出減少，而美國人嘅儲蓄意識較弱，勢提高非必需消費品支出，投資者可留意相關美國交易所買賣基金（ETF），好似領航非必需消費品ETF（美股：VCR）。但低油價無疑拖累電動車發展、私企相關投資及消費者購買意欲，今年行業前景偏淡。

「三桶油」ELI年息十厘

李：恒生銀行投資產品及顧問業務主管 李佩珊

彩兒：最近有股友投資緊「三桶油」嘅股票掛鈎投資（ELI），玩法係喺合約中設定贖回價及接貨價嘅上下限，如果股價喺個範圍上落，就可以收息，如果股價升穿贖回價，發行商就提早贖回，結束合約；如果股價跌穿下限，投資者要以接貨價買入掛鈎嘅股份。

李：ELI產品多數係金融機構為投資者度身訂造，散戶入場費低至8萬港元或等值外幣，只有合乎監管機構要求的股份先可以做相關投資，佢哋可以喺金融機構分行或網上認購。

ELI市場自去年初起氣氛持續升溫，近期油股相關投資的查詢都多咗，散戶可以揀掛鈎單一個股或一籃子股份，以兩至三個月年期最受歡迎，目前以加入氣墊機制及可提早結束合約等條款嘅油股ELI嚟講，年利率約10厘。散戶要留意，大多ELI非保本同唔受香港存款保障計劃保障，而且投資者持有股票掛鈎產品唔會獲得股東權益，好似收股息咁。

彩兒 Kitty

若有料報畀彩兒同Kitty或有嘢問，可電郵money.biz@on.cc