絲絲講場：創銀換新Logo等過年

絲絲趁呢幾日聖誕假期去咗行街街，除咗見到周圍掛滿聖誕裝飾外，仲發現創興銀行（01111）個Logo換咗新衫，前面加咗兩個好Sharp醒嘅橙色英文字「YE」，真係成個Young番晒。

創銀雖然今年二月已加入越秀集團，但尋日先公布換新Logo。本來個Logo只係得「創興銀行」四個黑色標楷體大字，再加一行英文名，其實望落好秀氣，但真係齋咗小小囉。

換咗新衫就唔同喇，黑白Logo前面加咗兩個橙色英文字「YE」，「Y」就嚟自越秀個英文名，而「E」嚟自英文「Excellent」，夾埋就喺「不斷超越，更加優秀」咁解，遠睇更似飛梗嘅雀仔咁。