有去開置地廣場嘅朋友近兩星期應該感覺到濃厚嘅聖誕氣氛，除咗見到啲熱氣球喺空中升降外，仲不時聽到有團體報佳音。絲絲前排留意到好耐冇見嘅上海商業銀行董事長榮智權同埋榮太（Polly）帶領一班銀行同事唱聖誕歌。
除咗上下一心做啲應節嘢，上商今次喺置地廣場唱聖誕歌係為咗幫「兒童發展配對基金」籌款，傳頌關愛青少年發展的訊息。
參與公益活動咁有意義嘅事除咗一班做細嘅要出席，一眾大Banker都有積極響應，當日上商常務董事兼行政總裁郭錫志（David）同埋加入無耐嘅產品拓展部主管陳志偉（Ricky）都有出嚟撐場，合共超過六十個員工，以平安夜一曲拉開籌款序幕，唱足半個鐘，吸引唔少途人駐足欣賞。
上商今年第二年幫手籌款，同事們都好踴躍參與，表演之前幾難約齊人都排練咗五次，非常有心。
余絲韻