絲絲講場：小加成功減肥過聖誕

港交所總裁李小加亦寫咗封信畀聖誕老人，總結今年成績同預告港交所來年計劃，而佢今年最重要嘅就係成功瘦身兩磅。

唔好以為減肥淨係女士們嘅願望呀！喺信入面，李小加分享自己成功減磅嘅喜悅。佢話自己好為食，所以靠參加足球比賽而減咗兩磅覺得好開心。佢又提到呢個月同深圳證券交易所嘅比賽，佢特別感謝隊長畀佢踢咗整個半場，雖然呢半場基本上連波都掂唔到，但佢依然為1比1嘅賽果感到自豪。

滬港通戰績有交代

絲絲睇完之後，覺得呢兩磅減得好抵，因為李小加除咗喺運動方面出力外，減磅期間佢仲開通咗滬港通添！雖然依家成交量唔係好多，但總算順順利利。另外，李小加話成功整合咗LME「商品翼」業務，例如搭建咗「東翼」廚房──香港交易所亞洲商品平台，以後會推出更多菜式。

除咗講自己戰績，李小加又表揚港交所職員為香港盡心盡力，仲話今年港交所有21位成員步入婚姻嘅殿堂，仲有28位寶寶誕生，佢希望港交所每個人來年都健康快樂、工作順利！

余絲韻