黑客入侵索尼（Sony）電影公司後持續有料爆，今次就洩露阿里巴巴想投資翻拍八十年代經典電影《捉鬼敢死隊》。潮流興懷舊，如果成事可以話係觀眾之福，唔知到時會唔會有中國特色嘅捉鬼隊員出現呢？
話說今年十月，阿里一眾高層喺李連杰帶路之下，去拜會荷里活電影人，索尼電影係馬雲唯一一間親身上門嘅電影公司。根據黑客公開出嚟嘅索尼電郵顯示，除咗《捉鬼敢死隊》之外，阿里亦都有興趣投資明年上映嘅3D動畫《Pixels》，以及希望能夠開拍《蜘蛛俠》入面奸角Sinister Six、網遊《龍族》、日本漫畫《海賊王》相關嘅電影。
根據一啲消息人士爆料，阿里希望以「部頭制」投資，即係只會投資有興趣嘅電影，而唔會投資落電影公司。而阿里去荷里活，亦都係希望可以傾成一啲電影、電視嘅版權，以協助阿里喺中國400億元人民幣嘅網絡視訊市場分一杯羹。
電郵入面亦見到，索尼電影極力拉攏阿里，睇中佢喺市場推廣、資金、產品銷售方面可以有極大助力。
余絲韻