最近有網站上載咗一篇同出名「寸嘴」嘅美國對沖基金Pershing Square創辦人兼維權投資者阿克曼（Bill Ackman）做嘅專訪，喺訪問之中，佢提到自己對旗下基金今年嘅表現非常滿意，然後仲好有信心咁話自己起碼可以炒股最少炒多30年添！而阿克曼今年嘅戰績又幾巴閉嘅，難怪佢私底下成日掛住喺嘴邊嗰句華爾街名言:「無論怎麼玩，贏的都是我。」
今年，佢嘅對沖基金旗艦Pershing Square花咗大部分時間喺收購著名生產肉毒桿菌股份Allergan上面。雖然最後嘅結局係收購唔到，但係喺對話之中，唔難發現阿克曼其實對呢個結果好滿意。佢形容，今次嘅收購達到嘅係「最理想嘅效果」。梗係啦，收購唔到都賺成接近24億美元喎！
至於點解會係咁？原來，早前Pershing Square聯同旗下嘅加拿大威朗制藥公司（Valeant）喺協商收購Allergan嘅時候已經偷偷地吸納緊呢間公司約1成嘅股票。而喺收購期間，該股股價大漲65%，投資咗3成資金喺呢隻股票嘅阿克曼當然賺到笑啦！而成功收購嘅阿特維斯藥廠都唔知喊定笑好。
另外，被問到對自己將來發展嘅睇法時，佢就認為自己依家48歲呢個年齡係人生里程碑。佢以著名投資者、Wendy's漢堡包主席佩爾茨（71歲）、蘋果公司著名維權股東艾肯（78歲）同股神巴菲特（84歲）為例，話佢哋幾個都一把年紀都依然活躍喺股場上，咁就證明佢都可以炒股炒多最少30年喇！佢仲話真係好享受做呢行添。
余絲韻