東驥基金管理董事總經理龐寶林向來都好鍾意運動，打網球更加係佢「至愛」，今日仲會親身打番幾球波撐老友場，以香港中文大學EMBA隊代表身份，參加「2014年香港國際EMBA網球賽」。
呢個比賽係由香港元老網球總會主辦，香港「電梯大王」胡法光之子、身兼菱電發展主席及城大校董會主席胡曉明，就係呢個會嘅會長，同時亦係龐寶林喺聖保羅男女中學嘅師兄，難怪兩人咁老友！
龐寶林話胡曉明嘅「球技」好勁，犀利過佢好多，兩人有時仲會打番場友誼波互相切磋。以前胡曉明幫網總做嘢時，都有拉埋龐寶林入去，幫手搞一啲公司比賽。
講番今次比賽，除咗中文EMBA網球隊同城大EMBA網球隊協辦外，仲請咗中山大學、復旦大學、中歐商學院同埋廈門大學四間「過江龍」參賽。
龐寶林對今次嘅比賽充滿信心，因為隊中新添兩名女隊員，龐寶林以「球藝不凡」嚟形容兩位女士，實力應該有番咁上下。
上個月佢哋成隊人去上海，參加咗內地另一個全國名校EMBA網球大賽，叻到攞咗一個團體組別嘅冠軍，事後仲一齊去上海崇明島食大閘蟹、海鮮慶祝，實行「刷」番餐勁，獎勵吓大家！
余絲韻