Market Insight：渣打不妨趁低儲貨

然而，古勝實話實說，九月二十六日佔領行動爆發前，恒指在23,678點水平，經歷個幾月時間仲累積17點進帳，到底數據受訪企業高管杞人憂天，抑或股市大孖沙過分樂觀，大家自已判斷。

阿里巴巴在紐交所愈戰愈勇，隔晚升4.1%收報106.07美元，創掛牌以來新高。本地基金炒無可炒，追騰訊（00700），推高股價1%報124元，成為指數貢獻最多藍籌，可惜濠賭股彈完又再跌過，加上中資股走勢麻麻，兩桶油、內銀及中移（00941）腳軟，個市無咗牽頭板塊帶動。

古勝冇點你 2014/11/06

萬里長空

今年唔少本地股票基金都出現贏唔多、輸唔死的悶局，滿以為年尾有滬港通炒吓幫幫條數，最後好夢又落空。老實講，睇見八月全國發電量出現負增長，工業生產附加值，跌到衰退臨界點邊緣，話唔驚祖國經濟硬着陸就假。偏偏人行條頸鐵咁硬，死唔肯由「微刺激」轉為「強刺激」，全面降準同減息，大孖沙對中資股有所戒心，是可以理解。

大市欠缺誘因再上

本來第三季中國GDP落到去7.3%，已經唔算標青，有報道話由已發布第三季GDP的內地26個省市，初步合計GDP條數居然大過官方全國數字，可見地方政府「灌水」情況之嚴重。

啱啱國統局話今年底明年初，會開始推國際標準修訂的GDP核算方法，喺保增長大前提下，好奇怪在現時的敏感時刻，阿爺會真係如實報數，投資者又會點睇？在下都想知道答案。從投資角度出發，短期如果無滬港通，人行又唔肯跟大圍帶中國進入新一輪寬鬆貨幣周期，短期中港股市要出現明顯突破並唔易。

今時今日跨國銀行生意唔易做，朋友在私人銀行部門工作，話依家新客凡係揸美國或中東護照，或者有生意喺澳門，開戶都可免則免。事關依家歐美監管機構諸多抽秤，搵藉口罰錢發晒窮惡，唔少大銀行下面的私人銀行部門，老早發指引話情願少做少錯。

滙控（00005）及渣打（02888）季績曝光後，股價均向下。在環球去槓桿化，炒房又搵唔到食底下，業績麻麻是意料中事，最唔明朗反而是死唔斷氣的調查及罰款，好似滙控仲畀英國金融業操守監管局咬住唔放，就外匯交易業務展開調查，結果未知，市傳美國司法部及曼哈頓檢查官員，都重新展開對渣打調查。

深國現有賣點一般

從渣打股價表現，看來再樂觀的捧場客都開始失去耐性。君可見金融海嘯最惡劣時，渣打最低落過0.83倍PB，而一四年PB得0.78倍，仲衰過海嘯期，永續債券約4厘水平，一四年股息有5.6厘。古勝認為股市錯價可能性唔細，唔怕坐可酌量儲啲。

深圳國際（00152）自年初炒前海概念後，股價一直沉靜，直至近月受物流股炒作潮，股價走勢才好轉。公司股價由八月初9.7元升至12元以上，累積升幅領先大部分同業。公司把握時機宣布配股，集資約19億元，對一間擴充中的公司嚟講，藉股價升勢集資用以擴充好正常。

公司指集資用於建立「深國際城市綜合物流港」，由於建立物流園最少需時數年，估計一七至一八年前難以看到收成。當然，公司除了物流園這項大計外，前海的土地用途也能被市場忽略。

公司一直意圖把前海倉庫透過補地價改造成商業用地，雖然補地價金額遲遲未有定案，但若前海發展啟動，所需的發展資金必然龐大，故公司預留資金以防不時之需也可理解。若撇開前海用地，單以物流業務計算，深國盈利增長多年平平無奇，以往績市盈率約11.5倍及3.8%股息率來看，估值實難找到賣點。

財險伸手 股東無奈

此外，中國財險（02328）亦突然宣布供股集資。由於事出突然，股價曾低見13.54元，收報13.82元，跌2.5%。財險在去年才進行供股，如今卻又再傳來伸手消息，真係令小股東費解！但若然唔供，又要眼白白睇住持股量被攤薄，相信連基金股東都頭痕。

不過，財險係現成內險股中，首選的財險類股份，加上本身經營表現唔差，照計最終大部分股東還是會選擇乖乖科水。走勢上，13元水平乃近兩個月的主要支持位，若然消化供股消息後，股價未有失守支持位，則後市仍有機會向上試衝主要阻力位15元水平。

古勝