渣打銀行每年嘅渣馬，已經係香港盛事之一，其實佢哋仲有一個活動，非常吸引兼「養眼」，就係一年一度嘅「渣打藝趣嘉年華」。渣打香港行政總裁陳秀梅話，經過14年嘅努力耕耘，呢個項目已經成為一個通過藝術教育推動青少年發展嘅重要項目，更為社會注入正能量，睇嚟絲絲都要去吸收吓正能量。
「渣打藝趣嘉年華」首次於○一年舉辦，係每年一度、為期6個月嘅青少年藝術發展計劃，每年十一月舉行嘅嘉年華係整個項目嘅高潮，今年主題係「藝遊科幻境界」，匯聚超過3,500個本地青少年同專業藝術家嘅創意，展現藝術同科學所交織出嘅強大力量。
嘉年華嘅重頭項目，係十一月十六日舉行嘅「壓軸巡遊」，超過600位青少年參與其中，盡情發揮創意同才華。巡遊隊伍將會展示11組高達12呎嘅巨型木偶、60個撐竿偶，同埋由本地藝術家、學生共同創作嘅逾千件巡遊服飾，肯定令人眼界大開。