絲絲講場：光棍奉命 唔准搵老襯

各大電商公司大力宣傳，話自己嘅價格將會點平點抵，過去甚至爭相打出「最低價」旗號，大打誤導宣傳擦邊球。不過今年可能冇呢支歌仔唱喇，事關國家工商局已經明令禁止電商企業胡亂用「最低價」字眼！

工商局禁虛假促銷

「光棍節」促成嘅網購超級多，消費者對「假打折」投訴亦持續增加，國家工商局近日約見阿里巴巴、京東、蘇寧以至外資亞馬遜商城等十家電商公司，想防止電商平台，喺「光棍節」嘅促銷中，進行虛假宣傳。

工商局除明確禁止「最低價」促銷外，亦表示注意到行業中，有經營者以虛假交易、刪除不利評價、惡意損害同業信譽嘅方式，以提升本身嘅客戶口碑。

阿里上季料多賺21%

喺競爭劇烈下，電商公司以較為出位手段宣傳，有時確係無可厚非，但如果規管部門唔出手強調一吓「市場秩序」，「光棍節」隨時變成「老襯節」！

講開阿里，佢哋今晚公布上市以來首份季績，市場估計平均盈利有望超過71億元人民幣，按年升幅大約21%。阿里對「光棍節」嘅促銷部署，肯定繼續會成為投資市場嘅關注重點。

余絲韻