阿里主席馬雲熱愛武俠小說，以金庸小說《笑傲江湖》中嘅一代宗師風清揚自居，旗下員工入職時都要揀個武俠小說中嘅人名作為綽號。
絲絲尋日撞到阿里雲業務發展部總監徐敏，見佢卡片上印住嘅綽號係「九河」，正煩惱緊係出自邊本武俠小說嘅人物之際，徐總笑住話自己綽號係來自《禹疏九河》，即係大家耳熟能詳大禹治水嘅傳說，仲話因為入職遲，合適嘅武俠小說人物名稱早就已經畀同事揀選了。
徐總話畀絲絲知，阿里對同事揀選嘅武俠小說人物名稱有要求，要係正面、無爭議性嘅人物，阿里首席執行官陸兆禧用鐵木真作為綽號，而首席風險官邵曉鋒揀選咗郭靖，不過好似《神鵰俠侶》主角楊過呢啲具爭議性嘅名就唔用得。
絲絲當然八卦問吓有無同事用楊過老友「鵰兄」呢個綽號，徐總就笑笑口話呢個唔係人名所以都無同事用，佢仲同絲絲講每個綽號都會登記喺公司系統，所以唔會撞名。據聞阿里員工喺公司嘅系統、同事間相互稱呼都係用綽號添，相信可以拉近同事間距離。
余絲韻