微軟前行政總裁保曼，今年先後辭去公司行政總裁同董事個位，你以為IT人退休之後就會過啲逍遙自在嘅生活？
錯啦，佢最近接受《福布斯》雜誌十月號嘅封面人物訪問，就話展開新嘅人生旅程，當下仲有七大目標，第一樣就係好似蓋茨咁，成立自己嘅慈善事業，形容係他人生嘅第二春。
保曼喺微軟工作咗35年，以58歲之齡坐擁225億美元身家，排喺《福布斯》富豪榜第18位，啱啱就喺華盛頓州嘅Bellevue租咗層喺40樓嘅超級公寓，景觀開揚，可以睇晒成個西雅圖同雷尼爾山嘅全景。
保曼接受訪問時話自己退休之後，新任CEO納德拉依家逐步調整公司嘅策略，可能久唔久先同佢聯絡一次。為咗令自己退休後唔會太得閒，佢就話已經為自己定咗七樣嘢要做。
由最小嘅事數起，第一樣：就係健身，之後就要打好啲Golf（因為傳聞佢係福布斯富豪榜入面打Golf數一數二最差嗰位），第三就係以股東身份去睇住佢持有嘅3.33億股微軟股份（唔通會好似伊坎咁，適當時叫CEO做分拆？），第四，就係學新嘢，如學習希伯來語，因為身為猶太人嘅佢，細過原來冇行過成人禮。
講完小嘅事，開始輪到大事啦，相信大家都記得，保曼之前以20億美元買咗NBA洛杉磯快艇隊，幾乎人人話貴，但佢仍然覺得係物有所值。而收購快艇隊除咗令保曼走出西雅圖之外，今年秋天佢仲會喺史丹福大學同南加州大學嘅商學院任教。
另外，保曼都想建立自己嘅慈善事業，所以就聯同太太Connie同各類人打交道，睇吓自己啲錢可以為社會做啲咩。雖然佢仲未成立自己嘅基金會，但唔想似好似巴菲特咁將錢交由蓋茨基金會打理就算，而係想自己行出一條路，出錢又出力！
余絲韻