絲絲講場：利郎老總變身代言人
為慶祝上市五周年，利郎（01234）尋日專誠喺九龍一間五星級酒店搞Fashion Show暨酒會賀一賀佢，絲絲仲發現，副主席兼行政總裁王良星一身灰色Dot柄老西原來都係品牌嘅春夏新裝之一，實行變身代言人，自我宣傳！
首次在港大搞服裝Show
今次係公司上市後首次喺香港搞Fashion Show，展示旗下男士品牌「LILANZ」一五年嘅春夏新裝。
據知，天橋上男模特兒展示嘅服飾全部都係由外國設計師團隊操刀，設計師話，佢哋嘅靈感係取自中國傳統建築物，好似紫禁城咁，果然係充滿著中國傳統特色！
集團上半年業績已派中期特別股息，對於上市五周年會唔會再派特別股息，副主席兼執行董事黃聰星就指，會根據盈利、現金流及投資情況決定，「目前來看，應可維持（派特別息）嘅。」
余絲韻