股神巴菲特投資都會「中伏」，英國超市「一哥」Tesco之前爆發會計醜聞，搞到股價今年跌幅迅速擴大至最多43%。
唔止咁，仲連累埋持有Tesco 4%股權，位列第三大股東嘅股神投資旗艦巴郡，帳面勁蝕差唔多7.5億美元（約58.5億港元）！
股神向來都為食，除咗富國銀行之類長線持有嘅價值型股票外，日常生活消費以至飲飲食食嘅股份，都有涉獵。
而Tesco之所以獲股神垂青，大抵因為當年Tesco成功進軍美國，喺南加州開設首家超市，打破英國零售商難以喺美國立足嘅魔咒，當時就令股神刮目相看。
奈何Tesco今年諸事不利，據報原先準備十一月喺英國開張嘅巨無霸超市亦要無限期押後，評級機構標普禮拜三仲警告，萬一會計醜聞嘅調查結果，驅使佢將Tesco企業管治評級調低，佢哋可能會將Tesco信貸評級貶為「垃圾」，睇怕股神嘅持股價值仲會有排跌。
不過，英超球隊紐卡素班主艾殊利驚都未驚過，見到Tesco股價跌到十一年低位，即刻透過佢打骰嘅英國最大體育用品零售商Sports Direct，豪擲約7,000萬美元低吸「博反彈」，又同Tesco研究縮小巨無霸超市賣食物嘅範圍，引入其他店舖同食肆，希望做返旺個場。
其實零售股可以話係股神嘅死穴，佢老人家談及呢個板塊嘅往績時，評價唔係話「差」就係「糟糕」，話因為消費者購物模式同商戶銷售渠道「五時花六時變」，做零售其實好難建立競爭優勢，同埋觸摸唔到網購帶嚟嘅變化喎。
余絲韻