潮流興「點評」，餐廳、服務、產品都評一餐，美國最大點評網站Yelp最近登陸香港，仲打算開設「荀工」一份，聘請專員專責吃喝玩樂，咁吸引就連絲絲都想飛身去做！
Yelp推出香港版網站，所有人都可以建立帳戶做「Yelper」。Yelp新興市場副總裁Miriam Warren話，香港係繼日本後第二個進軍嘅亞洲市場，佢哋每進入一個市場都會請一個本地「社區經理」，由佢發掘最地道嘅美食或者好去處，之後就喺網站上面撰寫評論，同向外推廣Yelp網站，建立起本地嘅「Yelp社群」。
Warren都係做「社區經理」入行，工作相當精彩，「今日下午去試不同嘅酒吧，聽日就喺電視介紹情人節慶祝熱點……每日都可以試新嘢，如果係鍾意四圍飲飲食食就最適合。」
至於呢份「筍工」嘅待遇係點，佢大賣關子，不過成為Yelp嘅一分子就可獲分公司嘅股票。Yelp前年三月已經喺紐交所上市，股價表現仲相當靚仔，累積升幅超過1.9倍。想搵筍工嘅「食評家」不妨留意住Yelp嘅港版網站啦。
余絲韻