絲絲講場：馬雲賺埋夫妻感情
女人錢易賺，商業奇才阿里巴巴集團主席馬雲深明此道，阿里唔止有極高比例嘅女性客戶，最近又度到新橋，喺支付寶推出「親密付」新功能，方便老公為上網購物嘅太太找數。
「親密付」似碌附屬卡
「親密付」係支付寶8.3版嘅主打新應用之一，作用係令支付寶可以提供類似附屬卡功能，畀支付寶用戶可代子女、父母又或者另一半，進行網購等等嘅電子支付。
由於「親密付」最高支付限額每月可以達2萬蚊人民幣，唔少內地網民都話，呢項新功能可以作為「感情試金石」，試驗自己嘅另一半願意為自己承擔幾多「網購簽帳」。
阿里買家七成女人
女性網購一向係內地電商發展嘅主要動力，馬雲喺紐約出席「克林頓全球倡議（GCI）」年會時亦話「我要感謝女性，沒有你們阿里不可能成功到紐約上市」。
女性威力有數據支持，阿里嘅買家中有70%係女性，包括淘寶店主在內嘅賣家亦有50%係女性。
馬雲同時大談電商發展點樣協助女性創業，又笑言小微金融負責嘅阿里小貸「較為傾向貸款予女性，因為她們更為可靠」。佢嘅講法唔止打動女性買家，就連在場嘅克林頓夫人、美國前國務卿希拉妮都拍爛手掌。
余絲韻