正值多事之秋嘅毅德控股（01396），繼主席王再興失去聯絡之後，再有管理層變動，今次輪到副總裁兼首席財務官吳波唔撈，公司搵咗年僅41歲、先後服務過至少五家上市公司嘅陳思翰接任CFO呢個位。
毅德尋日公布，吳波因為個人事業發展理由，所以唔做副總裁兼首席財務官，佢同董事會都冇任何意見分歧。同日，新嘅CFO陳思翰就已經返咗工。絲絲喺毅德做嘅朋友話，雖然又有高層人士變動，但公司依家運作都算正常。
上市唔夠一年嘅毅德，喺七月公布，與前主席王再興失去聯絡超過兩星期，其後決定由佢細佬王健利頂上。公司股價梗係冇運行啦，股價一路都爬唔返去停牌前水平，尋日個市熱到爆，公司股價就跌6%贈興。
睇番陳思翰履歷，原來佢做過至少五間上市公司。佢本身係會計師，做過兩間內房嘅CFO，分別係五洲國際（01369）同埋花樣年（01777），之前就做過富麗花譜（現稱EDS Wellness）（08176）、中國礦業資源（00340）、大中華實業（00431）嘅高層。
余絲韻