絲絲講場：飛達請孟加拉人慳九成
喺內地開廠嘅港商，呢幾年畀工資同埋一大堆環保稅困擾，飛達帽業（01100）副主席兼董事總經理顏寶鈴，都呻要搵出路，佢哋揀咗孟加拉，皆因人工只係內地嘅十分一，請人亦容易。對內地咁有感情嘅顏寶鈴都咁做，你話內地製造業前景究竟有幾好？
佢話孟加拉一個月人工大概係530蚊，已經包晒保險同稅，請十個孟加拉工人先等於一個內地員工，所以大搞孟加拉絕對係高成本效益。唔單只平，量都好多，一日之內閒閒哋請到200人。
新廠未起好寧願推單
依家佢哋嘅廠，有2,700個人員工，已經多過內地員工。配合埋孟加拉廠房加建，預計最多可以容納4,000個員工。
內地廠房員工自然流失，工人得番2,000個。公司亦投資好多錢搞發電，目標係出年二月中，將孟加拉嘅生產，拉高到佔公司總產能三分二。
佢話孟加拉廠仲興建緊，搞到公司上半年供貨不足，年頭至今已經推咗800萬美元訂單，期望孟加拉生產陸續增多，咁出年一月起就唔使再推訂單。佢話推單唔驚得失啲客，反而接咗又做唔嚟又要賠錢又交唔到貨就仲唔好。
余絲韻