絲絲講場：證監港交所A股開Talk

除咗監管機構、市場人士外，股民係咪都準備好搭呢架「直通車」，亦都係頭號大事，所以證監會旗下投資者教育中心同港交所（00388），今個月廿二號便合辦一個滬港通免費講座，畀公眾人士報名參與，名額有三百多名，先到先得，所以有興趣股民好快啲報名，滿額即止！

教玩滬港通風險

其實港人買A股，猶如隔山買牛，好多散戶可能連A股上市公司啲名都未講得出，莫講話了解A股市場同香港市場究竟有乜差異。

所以呢次講座，內容會包含多個主題，好似係滬港通買賣A股與港股嘅分別、A股市場嘅特色同風險、散戶投資者應該留意嘅滬港通相關規則同法例、同埋有乜投資者保障等等。真係好啱A股市場「初哥」去聽。

拍埋教育短片仲易明

投資者教育中心會視乎股民反應，係咪考慮再舉辦相關講座。中心亦都會製作教育短片，等股民更加了解滬港通嘅運作。

但股民要注意，呢個講座唔係股東會，唔會設茶點招待，股民要專心聽Talk呢！

余絲韻