期指觀瀾：候25250水平再買入
都怪筆者太穩陣，見指數五月初從未連續四日收低於20日線，怕港股升勢轉弱甚至出現向下俯衝，前日將手上好倉平掉。踢波至嚟落雨，唔通個天都唔鍾意我，平完即大挾。
過去三日，港股都唔多願意跟A股升，昨日好友一次過報晒仇，恒指升568點收25,317點，直到四點零七分，見彭博資訊顯示俄羅斯總統普京宣布與烏克蘭達成烏東永久性停火新聞，第一反應係唔單止春江鴨，可能連普京都揸重期指（講笑）！
期指日市收25,315點，較合理值25,226點足足高水89點，淡倉客冚到開巷之外，亦反映基金經理在現貨買唔夠，只有向期指市場着手。昨日升市，主板成交1,004億元創七月三十日以來最高紀錄外，絕對有高成交配合升市，即月期指日市，成交增至7.26萬張，比前日多四成七。
昨日早市見恒指破20日線兼重上25,000點企穩唔回，筆者先買回一注好倉，可惜昨提出等跌定再買，無留低入市條件。經昨日一挾，恒指應以上次高位25,243點作為短期支持，進一步上試高位，昨期指成交密集區不是上晝出現，反而是下晝的25,250點上下25點子，短期會有支持，未有倉者不妨候這區域補回好倉。
John Mullen