Market Insight:燃氣股吸引力重現

自○八年以來,中移(00941)第一次返回「紅底股」身份,加埋熱錢無嘢好炒,在追落後之下,三大內銀股狂升2.7至4.5%,成功將恒指推返到兩萬五點樓上,退避三舍的淡友終於全軍覆沒,恒指昨升569點收25,317點,創海嘯後的新高,主板成交過千億元。

昨日所見,明顯基金在現貨市場買唔夠,故期指都掃住先,令到九月期指日市升623點收報25,315點,扣番今個月的除息因素,實際高水89點之多。

A股之前連升三日,港股唔多願跟,到昨日滬綜指再升22點收2,288點,居然推到港股井噴式爆升?現貨收市後,外電報道話俄羅斯總統普京同烏克蘭總統波羅申科,就烏東達成永久停火協議,歐股開市無耐,因為消息全線抽升,莫非春江鴨預知未來,定係呢個世界真蹺成咁。

資金再次risk on

今晚歐洲央行開會,利率期貨顯示得番0.15厘的歐元再融資利率,有機會再減到落0.05厘。美國啱啱先開始退市,那邊廂歐洲央行開行水喉,近日荷蘭、挪威等西歐國家的兩年期國債孳息,史無前例地跌到去負利率。債市預咗歐洲央行減息不特止,仲會在未來三至六個月推出更大規模QE活動。

反觀今年三月十六日,烏克蘭克里米亞歸屬公投,結果係大多數當地居民想脫烏入俄,俄烏局勢時好時壞,一直僵持不下,到美國及歐盟先後宣布制裁俄羅斯,六月底至今,俄羅斯盧比貶值一成二,泛歐債券全升底下,俄債卻持續淨流出,十年期債息由8.3厘去到上月初見9.9厘。

俄股由六月底高位最多跌過一成二,今次銀彈同導彈之間,普京選擇了前者,消除咗歐洲經濟中短期內最大的不明朗因素,睇怕新一輪的環球股市risk on,可能已經在昨日展開。

收到十八份標書的尖沙咀中間道非工業用地,由恒地(00012)以46.88億元奪得,計及可建樓面33.97萬方呎,呎價達1.38萬元,比市場預測上限仲要高近5%。

新一輪由歐、日主導的水浸全球經濟形勢下,本地發展商對資產價格繼續向北的信心頗強。昨消息公布前,恒地股價已升6.1%收報55元,成為升幅最大藍籌,現價市帳率0.73倍。

恒地仍然有水位

古勝重申睇好本地地產股,亦都相信恒地返回歷史市帳率大約0.86倍,即係65元左右一啲都唔過分,技術走勢上,下一站應該先挑戰60.5元。

昨日個市,始終係低估值重磅股依然是基金熱捧焦點,但個別消息配合的二三線股,也值得留意。業績後已經急升的金風科技(02208),宣布向高管等9名人士配售4,095萬股A股,配售價8.87元人仔,較A股前五個交易日收市平均價9.96元人仔折讓10.94%,集資3.63億元人仔。

先唔提點解折讓批股益圍內人士,股神巴菲特話管理層沽貨可以不理,不過,真金白銀增持只得一個理由,就係看好公司業務前景,加埋批股份有三年禁售期,唔怕一升上去佢哋食胡。以港紙計算,成本大約每股11元,或者等金風回吐可以作為支持位參考。昨日瑞銀報告將目標價調高32%,去到15.2元。

唔想追52周新高股份,燃氣股可以諗諗。早排基金狂質outperformer換貨,燃氣股業績再好都頂唔順,但近兩日見,唔少低位已經有支持,話晒中央支持潔淨能源的大方向不變,管道燃氣銷售預期在未來五至十年,都會隨住滲透率提高有穩定增長,現時幾隻基金追開的燃氣股,一四年PE落番去17至22倍之間,估值已開始吸引。

中燃盈利具保證

先講貴些少的中國燃氣(00384),因為八月中時有中石化(00386)減持舊股,股價級級落,昨日收報14.44元,其實仲未去返減持價,但有人漏夜趕科場。

據港交所(00388)股權披露資料顯示,一向被北控(00392)及南韓SK C&C爭崩頭搶奪股權的中燃,獲北控在上月十四日接貨,當時在場內以每股平均價14.8元,合共買入7,275萬股,持股量上升至22.44%,進一步鞏固其最大持股的地位。

睇番今年三月底止中燃業績其實幾好,多賺46%至25.76億元,大行估今年全年賺32億至35億元,計番中位數增長都有三成,PE 20.7倍,股價近日14元樓下搵到支持,近日表現落後,加埋增長股難求,買得過。仲有早幾日業績後寫過,跌定可以諗撈底的華潤燃氣(01193),以及貪平可以諗隻估值一直相對大市落後的港華燃氣(01083)。

古勝