互惠基金領航集團好少回應資金出入，費事畀人話「吹水」，但創辦人博格爾日前竟然Send咗個Email畀「股神」巴菲特，讚佢係領航最佳Sales，仲好謙虛話自己作為老闆都只係夠膽認第二。
到底發生咩事，令呢位指數型基金先驅、比巴菲特年長一歲嘅投資名宿轉性開金口？
原來巴菲特三月寫咗封信畀老婆，教佢點投資遺產入面嗰舊絲絲可能做十世都賺唔到嘅Cash，10%買短期國債，淨番90%就買啲收費平嘅標指基金，仲話「識買，梗係買領航嘅標普500指數基金」。
有「股神」做代言人，領航標指基金之後五個月狂吸55億美元（約429億港元）資金，比舊年同期多近三倍，仲帶挈領航管理資產首度逼近3萬億美元，依家全球十大暢銷交易所買賣基金（ETF），七隻係領航，ETF產品今年嘅吸資能力僅次於貝萊德。
晨星（Morningstar）資料仲顯示，領航債券資產已經超越「債券大王」格羅斯打骰嘅太平洋投資管理（Pimco）。
當然，近排市場上嘅資金的確有轉投指數基金嘅趨勢，唔少採取主動投資嘅基金話，無論拉客定係發掘投資機會都變得困難咗，之但係領航業績咁驕人，認吓第二又如何呢，開心嘅！
余絲韻