絲絲講場：花旗舊生會星光熠熠

美資行花旗每年都會搞個晚宴，同喺公司工作超過25年嘅現職或前任同事食番餐飯聚聚，由於花旗喺行內有「少林寺」之稱，培育出一批銀行界精英，所以上星期絲絲喺佢哋個「舊生及銀禧職員會晚宴」都有幸見到唔少財金猛人。

陳子政退休忙過返工

全場最矚目嘅一定要數花旗香港區前行長陳子政（TC），佢喺花旗工作超過27年，由管理見習生做到上行長，○七年退休嗰陣先得50歲，羨慕死人。TC同我哋分享，其實佢喺30歲嘅時候已經決定咗50歲要準時退休，開展人生新階段。依家佢退而不休，縱使好多人話佢退休後生活好似仲忙過返工嗰時，佢話無論係「有糧」定「無糧」，都會好投入同享受，仲以自己嘅影響力繼續服務社群。

獲「卓越舊生」多謝Weber

當晚TC獲頒今年嘅「卓越舊生獎」，拎得呢個獎絕對係重量級人馬，上屆得主係梁錦松。

TC話，要多謝花旗香港及澳門區行長盧韋柏Weber提名佢，又希望同學會嘅同事們可以繼續承傳「少林寺」呢個優良傳統，培育出更多業界精英。

余絲韻