內地發展商恒大（03333）尋日公布業績，主席許家印唔知點解一路都冇答問題，係都要等到四點後，莫非有重大消息，要特登揀喺收市後公布？
搭正四點，許家印就話，查實恒大都已經發展到咁大嘅規模，嚟緊要走多元化嘅路線，「百分之百嘅企業，發展到一定規模都要多元化，以恒大嘅規模、團隊、資本實力，仲有品牌，如果唔走多元化，會浪費咗我哋嘅品牌」，尤其係依家中國正值改革時間，會有好多發展嘅機會，所以公司經過幾年嘅研究，今日對外宣布要走多元化嘅路線。
話時話，恒大除咗地產，近年已經涉足好多瓣，又搞足球又賣水，之前都有傳佢會做埋乳業，到底嚟緊仲想搞咩，許家印話要睇商機，可能係農業、畜牧業，更有機會做恒大糧油或者恒大嬰兒奶粉，仲話唔使等好耐就會有嘢公布，嘩！真係想BB仔以至阿公阿婆嘅錢都要賺埋喎！咁多嘢要搞，唔怪得恒大話有信心下年會做世界500強嘅企業啦。
余絲韻