絲絲講場：金鷹請CEO搵足八年
百貨連鎖店金鷹（03308）上半年純利時光倒流至一○年，但董事長王恒仲好淡定，對下半年、明年業績「比較樂觀」，可能同終於搵到啱心水嘅CEO有關。所謂「工欲善其事，必先利其器」，呢位新CEO蘇凱做開電子商務同O2O業務規劃，曾任三福百貨CEO、IBM全球企業諮詢服務部南京分公司總經理，明顯為O2O業務平台打靚個底。
蘇凱加盟搞好電商
聽落好誇張，原來金鷹CEO個位懸空咗好耐。上一任CEO係○八年因個人事業發展只係做咗半年就離任，難怪尋日王恒突然好感慨咁話，「做電商考慮了八年，搵CEO也足足找了八年」，即係話金鷹係○六年上市時已經開始物色CEO。對於蘇凱加盟金鷹嘅經過，蘇凱笑言「機緣巧合」，仲強調自己同王恒對電商等看法不謀而合。
余絲韻