時富投資（01049）出售時富金融（00510）單刁仲傾緊，不過佢哋都冇放軟手腳，繼續落力吸客做生意。計絲絲話，「滬港通」就嚟「開車」，加上多咗咁多資金雲集香港，真係千載難逢機會，生意緊係做得幾多得幾多啦。絲絲就見佢哋最近出優惠，開戶有自助餐食。
時富金融最近推出左一個免費自助餐優惠，只要成功喺時富開戶，兼交易的累積佣金達五百蚊，就可以獲贈自助餐禮券一張，好似都幾着數！
時富金融投資服務部行政總裁鄭蓓麗（Majone）話，佢哋定期都會推出唔同優惠，就好似之前iBond認購期間，股友新開戶，就可以退還車馬費活動，於是吸引到唔少新客幫襯。今次當然要再接再厲啦，Majone話香港人人都鍾意食自助餐，所以希望吸多啲香港客。
佢仲提早預告，下次優惠更加驚喜，因為見內地人好鍾意黃金，所以打算送金幣。其實係人都鍾意黃金o架啦，邊有分內地定香港人o架！
其實除咗時富金融，第一上海證券都有雙重禮活動，只要用指定手機App買賣港股，就有佣金八折。咁又係，依家用手機炒股仲方便，喺呢方面吸新客，都好正路呀！
余絲韻