絲絲講場：韓化妝品牌股價升逾倍

事實上，愛茉莉太平洋第二季盈利按年飆升52%，聽分析員講係因為唔少女士相信用咗愛茉莉嘅化妝品之後，就會有韓劇啲女明星咁省鏡。咁又係啊，你睇吓近排啲圜搏命升，內地大把女仔照樣飛去南韓入貨就知啦。彭博調查就顯示，分析員睇好愛茉莉股價未來12個月仲有得升9%。

上市公司搶韓星代言

其他南韓嘅零售同賭業板塊，要靠強國食胡，其中隸屬三星集團、超過90%收入來自免稅店嘅新羅飯店，股價今年升咗92%；南韓最大賭場營運商Paradise嘅股價今年大漲40%；專營賭場同酒店嘅江原大世界，股價喺公布第二季純利按年增長32%當日，跳升12%。

雖然中國經濟增長放緩可能會降低民眾嘅消費力，令呢啲股份估值偏高，但分析員話政府落力吸引內地人去南韓玩，例如出年起畀佢哋申請電子簽證，呢啲板槐都仲有增長動力。

香港啲上市公司都唔執輸，都爭住搵韓星做代言人，舊年AV Concept（00595）花千萬請PSY做代言人外，新秀麗（01910）請咗「星星」金秀賢、安踏（02020）旗下FILA品牌代言人係李敏鎬、味千（00538）就有朴海鎮做形象代言人，而且仲係味千咁多年嚟第一個代言人添！

余絲韻