絲絲講場:碧桂園嫡系都要起身?

碧桂園(02007)尋日公布人事變動,楊永潮辭任執董,佢仲有另外一個身份,就係創辦人楊國強嘅侄兒。絲絲聽老友分析員講,雖然今次董事會係走咗個家族成員,不過入面仲有起碼四個喺度,相信都唔係好有「去家族化」意味。

楊永潮辭執董冇震盪

老友話,今次人事變動對公司股價,應該不及今年三月,伍綺琴唔做公司首席財務官(CFO)嗰次咁大影響,話晒伍小姐負責睇數,辭任消息令股價有啲震盪。

公司尋日喺業績之後又公布,喺○六年十二月起出任碧桂園執董嘅楊永潮辭任,發展其他個人事務。楊永潮今年六月先由營銷中心總經理調任為董事局主席特別助理,不過當時執行董事職位就無變。

睇番年報,39歲嘅楊永潮透過太太持有371萬股碧桂園股份,只佔發行股本0.02%。舊年佢嘅薪金為190萬人民幣,連埋退休計劃嘅僱主供款,總薪酬195.4萬元。

三個「阿斌」肩負重任

對於又有人事變動,碧桂園總裁莫斌話,公司嘅銷售額由之前嘅400幾億人仔,加到依家超過1,000億,喺呢個高速發展環境下,一定會有管理嘅更新,所以喺今年市場處平穩嘅過程入面,故希望將管理提升,為長遠發展打下堅實嘅基礎。

莫斌話,啱啱加入為CFO嘅吳建斌喺資本市場同財務管理都係非常出色,相信對公司財務結構嘅改善有好大作用,至於舊年五月成為聯席總裁嘅朱榮斌,就希望佢可以收購更好嘅地皮,為長遠發展打下基礎。不過絲絲仲發現,呢三位要員都叫阿斌,又咁啱有中國海外背景,真係好巧合。

余絲韻