內地對外資品牌嘅反壟斷調查頻頻出擊，汽車行業走唔甩。但究竟外資壟斷情況對內地消費者有幾大傷害？內地地方省市物價局就發現，作為貴價品牌嘅平治（內地稱奔馳），喺內地零部件售價，竟然等同新車價錢嘅12倍！
內地買家一直埋怨呢啲外國牌子汽車，售價遠高於海外市場，原來要保養維修呢啲車，使費超貴。近期有消息話，內地有寶馬嘅分銷商、福士（內地稱大眾）及奧迪都被罰錢，皆因佢哋以壟斷方式，控制零部件供應，迫使車主「養貴車」。
今次成為最新調查對象嘅平治，據內地官媒引述江蘇省物價局指出，以逐件零件嘅單價推算，在江蘇周邊地區購買平治C系列嘅各項零部件嘅價格，竟然係整車嘅12倍。
壟斷問題存在已久，究竟應該點解決？有中國汽車狂人嘅吉汽（00175）主席李書福就話，最佳做法係進一步降低外資車廠在華嘅持股限制，打破國有車企與個別外資車廠聯手主導市場嘅有效方法。
講開吉汽，由其母公司持有嘅富豪汽車，近日就喺內地推出，吉汽入主後首款重新設計嘅運動型越野車（SUV）XC90。李書福呢項部署，對內地民營車企嘅發展，唔知可唔可以起強心針作用呢？
余絲韻