見過BCT銀聯集團董事總經理及行政總裁劉嘉時嘅人，冇一個唔讚嘆佢談吐得體、舉止優雅。謙虛嘅劉嘉時其實系出名門，父母家庭從商，90幾歲嘅媽媽來自上海，喺南京女子中學畢業，爸爸就讀過上海Saint John's大學，兩間老牌名校出過無數商界政界名人。
嘉時有八兄弟姊妹，除咗嘉時咁叻女，擔任BCT銀聯職務同香港信託人公會主席之外，佢二哥劉嘉敏都做過好多公職。
仔女咁有成就媽咪功不可沒，嘉時回想細個時候，家教相當嚴，爸爸見到成績表有A-都唔滿意，所以佢好緊張學業，不過最重要嘅係媽咪身教，做人唔可以怕蝕底，做任何事都總有嘢可以學到。
嘉時當年一畢業就喺美國大行做MT，身為唯一嚟自亞洲，仲要係女性嘅MT，不時受到唔公平對待，揀部門又只可以揀人哋唔要嘅信貸風險部門，日日留喺Back Office，不過今時唔同往日，依家最吃香嘅就係風險控制人才！
嘉時勉勵年輕人，無論同咩人合作、做咩崗位，幾時都要好似一舊海綿咁，不停吸收新知識，第時一定可受用。
余絲韻